السنوات العجاف

زائر

السنوات العجاف
ناصر محسب
من كام سنه
والنخل بيساقط رماد
وحروف بتنزف حزنها
مع إنها نفس الحروف اللي ارتوت
واللي استوت
على صوت بكاها ولحنها
ف نفس البلاد
ليه الحقيقه بتختلف
لما احنا نبقى ف اختلاف
علقت حزنك ياوطن
ع الاصطفاف
تستقطب الخوف القديم
هو احنا أصبحنا نخاف
طب قوللي مين بيجر مين
وليه نصارى ومسلمين
فرقين تلاته أربعه
والكل دخل المعمعه
هنعد سنواتها العجاف
محناش ضعاف
لكن الحقيقه بتختلف بالإختلاف
والدين بيصبح مستغل
مابين فتاوى وبين جهاد
الدم سهل ومستحل
وتقول لي حل
وتقول لي حل المسأله ف حب البلاد
هو احنا كارهين أرضها
فرطنا لحظه ف عرضها
خوف السنين اللي استقر ف نبضها
كالعاده ينكر كلمتي
وانا اللي خضرة خطوتي
جابت ف طولها وعرضها
ورهنت دمي ف السويس
على أرض سينا وبور سعيد
لما انكسرتي
كنت أنا الدمعه اللي فرت ف السجود
لما انتصرتي
كنت أنا برضه الشهيد
ويادوب مواطن
يحتمل مايحتمل
من بين حطام ليلك يعود
كفنت بالصبراحتمال النكسار
مع إني عارف إختياري
مكنش هو الإختيار
الكيل طفح
على زيف غناكي
واحنا على طرف النهار
مين اللي كان واخد القرار
والد ف إدين العساكر مستباح
( الجندي أو طفل البطاطا وقبلهم جابر صلاح )
لسه بتشعر بارتياح ؟
من بعد مالوطن اتسحل
على باب قصورك
لسه محتجز الصباح
شرعية القتل المباح
من جوه صندوق الانتخاب
وفتحت للأوهام حساب
بالسنه أو حكم الكتاب
أبجديات الخيانه والعماله
أو حصار الكلمه وميزان العداله
شيئ طبيعي ورد ميادين الكرامه
يتقطف على إيد ( أبو جهل ) ورفاقه
واحنا في عثر الجهاله
يبقى إمتى الفجر راجع ؟
اللي سلم واللي بايع
اللي تابع واللي تابع
اللي ف العصر الحديث
اخترع لغة الاصابع
ناصر محسب