السيناريو شعر:ناصر محسب
السيناريو كان معد
والبطوله في المشاهد
مستباحه لأي حد
والنظام محفظش دوره
...مكنش متخيل مصيره زي غيره
كان مراهن ع البطوله
واستبد برأيه وحده في القرار
والمسار واخده لحافة الانهيار المحتمل
جابنا من عصر الفضاء
لحد موقعة الجمل
................
السناريو كان معد
والأمل زهرة شباب مصر اللي كفن أمسه
راح جاب النهار من بكره حي
واللي زيه مكنش زي
وضي بكره لسه جي مع الصباح
لما لاح النور معاه
انتهى عصر الطغاه
واللي استبد
السناريو كان معد
بدون مؤلف
والنظام كان مراهن ع البطوله
وأمنا الغوله وأمنه المركزي
كان مراهن ع التخلف
والرصاص الحي وغازاته المسيله
.......................
والوطن يقطف زهوره في الميدان
تطلع ربيع
دمهم كان الخلاص
دمهم كان الضريبه من الجميع
والرصاص مكنش بيفرق مابين
إن كان محمد أو يسوع
هيه دي مصر اللي كانت
وسط احضان اللصوص
رجعت لنا
رجعت لأحضان الجميع
..........
السناريو كان بيتفصل مقاسه بالشروط
والخطوط تبدأ بتونس
تنتهي بالأنظمه الفاسده وآيله للسقوط
النظام اللي استباح فينا الكرامه والمعزه
واللي ساب اسرائيل تدبح في غزه
مين يقول ؟؟
اللي بيحارب عدوه يبقى خاين أو عميل
مين يقول ؟؟
لما بنعادي حماس سوريه وحزب الله وايران
تبقى حبيبتنا اسرائيل
مين يقول ؟؟
..........
النظام كفن ف عرشه
دق مسماره الأخير
بيده ف نعشه
باللي شطحوا واللي نطحوا
واللي باعو واللي غشوا
واللي زوروا واللي دمروا
واللي شرعوا واللي مرروا
واللي كتبوا واللي خطبوا
واللي هللو واللي طبلوا
واللي سرطنوا دمنا
النظام فرط ف شعبه
النظام فرط ف شعبه واستباحه
والنهار لملم جراحه
والسما بتبكي على الشهدا اللي راحوا
من النهارده الوطن
بيبتدي تاني صباحه
شعر /ناصر محسب